Saturday 17 August 2013

అధిష్ఠాన దుషట చతుషటయం!!


‘ఏంటోయ్ వెంకటేశం! మరీ నల్లపూసైపోయావ్! కొంపదీసి నీవు కూడా ఢిల్లీలో పాగా వేయడానికి రహస్యంగా  రోడ్డుమ్యాపులేమైనా వేసుకుంటున్నావా యేం?’
‘చాల్లెద్దురూ, మీ ఛమత్కారం! నా మట్టిబుర్రకంత సిత్రం ఉందంటారా? మా గల్లీ రోడ్లే సరిగా అర్థంగాక చస్తున్నాన్నేను. మీరేమో ఏకంగా ఢిల్లీకే రోడ్డుమ్యాపంటున్నారు. అబ్బెబ్బే... ఢిల్లీ గిల్లీ అయ్యే పన్లు కావులెండి.’
‘భలేవాడివటోయ్! ఇదేనా బుద్ధిమంతుల పద్ధతి? రాజకీయం చేయడం తెలుగువాడి జన్మహక్కని శాస్త్రాలు ఘోషిస్తున్నాయ్. పాలిటిక్స్ మన రక్తంలో ఉన్నాయిష! పైగా, అభినవ రాజకీయ దురంధరుడైన గిరీశం వద్ద శిష్యరికం వెలగబెట్టి ఆ మాత్రం లోకకళ్యాణానికి నడుం కట్టకపోతే చరిత్ర మనల్ని క్షమించదోయ్. అపర కమ్యూనిస్టుల్లాగా అంతులేని చారిత్రక తప్పిదాలు మనమూ చేద్దామంటావా? ఇకపోతే, ఇవాళ్రేపు రోడ్డుమ్యాపు రచించిన వాడెపో... అసలు సిసలు పొలిటీషియన్ అనిన్నీ; వాడికే సర్వోత్కృష్ట అధిష్ఠాన యోగం పడుతుందనిన్నీ మీడియా రేయింబవళ్లూ కోడై కూస్తోంది.’
‘చిత్తం మహాప్రభో! చారిత్రక తప్పిదం చేసేంత గొప్పోణ్ని కానులెండి నేను. తమరు కాస్త ఈ రోడ్డుమ్యాపు రాజకీయాల గురించి టూకీగానైనా జ్ఞానోదయం కల్పించి పుణ్యం కట్టుకోండి.’
‘చూడవోయ్ కుర్ర చాణక్యా! మచ్చుకు, మన సిగార్సు ఖర్చుల నిమిత్తం మీ నాన్న ఖజానా నుండి కాసులు కచ్చితంగా రాలగొట్టేగా కట్టుదిట్టమైన కుట్రపూరిత పథకమొకటి రచించావనుకో, అదో తరహా రోడ్డుమ్యాపన్నమాట. సింపుల్!’
‘హహ్హహ్హా! చూస్తోంటే, సూక్ష్మంలో మోక్షం సాక్షాత్కారం చేసే విద్య మీకు చుట్టతో పెట్టిన విద్యలాగుందే. అన్నట్టు, మా బాబు జేబుకు చిల్లు పెట్టి చిల్లర రాల్చటమన్నది అంత సులువు కాదండోయ్! ఆయన కూడా హస్తిన అధిష్ఠానంలా మహా ఘటికుడండీ బాబూ!’
‘చుట్ట ముట్టనివాడు మట్టి కొట్టుకుపోతాడన్నది శాస్త్రకారుడి ఉవాచ! దమ్ము లాగబట్టే కాదటోయ్ మన బుర్రలో దేశాన్ని ఉద్ధరించే ఐడియాలు కుప్పలుతెప్పలుగా తన్నుకొస్తున్నాయ్. ఏవన్నావ్... మీ నాన్నొక అధిష్ఠానమా? ఈ కురువృద్ధులొట్టి వెధవాయిలోయ్! వారొక పట్టాన మనకు పట్టుబడరు. దానిగ్గానూ వశీకరణ మంత్రం వేయాలోయ్.  ఓం ప్రథమం తాటిని తన్నేవాడి తలను తంతేనే మనకీ భూమ్మీద నూకలు చెల్లుబాటయ్యేది. ఆపై అధిష్ఠానం నాడిని దొరకబట్టి, దాని ఆయువుపట్టుపై పట్టు సాధించడమే అసలైన రాజకీయమోయ్!’
‘ఏమాటకామాటే చెప్పుకోవాలి గురూజీ! రాజకీయాలు రానురాను భ్రష్టు పట్టిపోతున్నాయి సుమండీ. సంస్కరణలు చేపట్టి కిష్కింధకాండ రాజకీయాల్ని జరూరుగా మరామత్తు చేయాల్సిన బాధ్యత మీదేనండోయ్. అన్నట్టు, హైకమాండు రాజకీయాల్ని ఔపోసన పట్టే ఆ వశీకరణ మంత్రం గురించి కాస్త వివరిద్దురూ... ?’
‘రాజకీయం చేయడం ఓ కళ! అందునా, అధిష్ఠాన రాజకీయాలు చేయడం అత్యున్నత మర్మకళ! అందుగ్గాను, తిమ్మిని బమ్మిని చేసే తాంత్రికకళలో ఆరితేరాలి. తాము చెప్పిందే వేదమని ఒప్పించే గోబెల్స్ నీతిని నమిలి జీర్ణం చేసుకోవాలి. జనాల్లో, పార్టీ శ్రేణుల్లో ఐక్యతను ఘోరీలాగా చీల్చి చెండాడాలి. ముఠాల్ని రెచ్చగొట్టాలి. కలహాల్ని సృష్టించాలి. మనోభావాలకు మంటబెట్టాలి. చిత్రవిచిత్ర సంకేతాల్ని ఎల్లెడలా వ్యాప్తిజేయాలి. అదేపనిగా అర్థంపర్థం లేని ప్రకటనలు చేయాలి. అయిందానికీ కానిదానికీ గల్లీ నేతలందర్నీ అస్తమానం ఢిల్లీ చుట్టూరా ప్రదక్షిణలు చేయించాలి. క్లూ ఇవ్వకుండా నేతల్ని అమ్మ ఇంటి ముందు క్యూ గట్టించాలి. డ్రెస్సుల్ని చేంజి చేసినట్టు ముఖ్యమంత్రుల్ని మార్చిపారేస్తుండాలి. తెల్లదొరలు నేర్పిన విభజించి పాలించడమనే కుట్రను నిరంతర కార్యాచరణగా పెట్టుకోవాలి. బుల్లి పార్టీల జెండాల్ని పీకేయించి గుటకాయస్వాహా చేయాలి. ప్రతిపక్షాల్ని కుటిల నీతితో చావుదెబ్బ తీయాలి. ఎవరేనా తోక జాడిస్తే ఉస్కో... అంటూ సీబీఐని ఉసిగొల్పాలి. దేశం నలుమూలలా రావణకాష్ఠం రాజేయాలి. ఆ రీతిన, రగిలే రావణకాష్ఠం మీద అధికార పీఠం వెలగబెట్టాలి. అద్గదీ సంగతి! అధిష్ఠానమా, మజాకా! ఆ విధముగ, అధిష్ఠాన రాజకీయాలు అత్యంత ప్రశస్థమైనవనే దర్మసూక్ష్మాన్ని గ్రహించడం అతి ముఖ్యమోయ్!’
‘అయ్యబాబోయ్! అరాచక రాజకీయాలన్నవి అధిష్ఠానానికి ఉగ్గుపాలతో పెట్టిన విద్యలాగున్నాయే. ఆ అఘాయిత్యాలు వింటేనే ఒళ్లు జలధరిస్తోంది. నేటి (అ)రాజకీయ పద్మవ్యూహంలో మనం నెగ్గుకురాగలమంటావా, గురూజీ?’
‘హార్నీ! నీ భయం బజార్న పడా! ఉట్టినే అలా జడుసుకుంటే ఎలాగోయ్! ధైర్యే సాహసే ఢిల్లీపీఠం హస్తగతం అని నవీన నానుడి. అధిష్ఠానయోగానికి ఉపకరించే ఓ డజను పుస్తకాల జాబితా రాస్కో! ‘డిగ్గీరాజా వారి ఢిల్లీ రోడ్డుమ్యాపు’, ‘అధిష్ఠాన విషవృక్షం’, ‘అమ్మనోట అంతిమతీర్పు’, ‘మన్మోహనబాబా మౌనవ్రతం’, యువరాజా పట్టాభిషేకం’, ‘ఢిల్లీ టాకిస్ వారి ముఖ్యమంత్రుల తోలుబొమ్మలాట’,  ‘సీబీఐపై సవారీ’, ‘మనోభావాలు దెబ్బతీయుటెట్లు?’, ‘సంకేతాలు, ప్రకటనలు, ఒక లోతైన పరిశీలన’. ఈ ఉద్గ్రంథాలన్నింటినీ నమిలి మింగేసి రాజకీయ కురుక్షేత్రంలోకి అభినవ అభిమన్యుడిలా లంఘించవోయ్! హైకమాండు సైతం డంగైపోయే రాజకీయాలు నీకెలాగ వంటబట్టవో నేనూ చూస్తా. అన్నట్టు, ఈ మారు కలిసినప్పుడు మన సిగార్సుకు మీ నాన్న పర్సు నుండి కొన్ని పచ్చనోట్లు పట్టుకొచ్చే మాట మాత్రం మరువకు సుమీ! సరే మరి, నాక్కొంచెం రాచకార్యాలున్నాయి. ‘రూపాయికి గుండెకోత - స్టాక్ మార్కెట్టుకు ఊచకోత’ అనే విషయమై ఇంగ్లండ్ బకింగ్ హామ్ ప్యాలెస్ లో ఏకబిగిన ఏడుగంటలు పాటు తెల్లోళ్లకి లెక్చరివ్వాల్సి ఉంది. నే వస్తా!!!



[Note: పత్రిక కోసం రాసిన ఈ రైటప్ ను అనివార్య కారణాల వల్ల కాస్త లేటుగా ఇక్కడ పబ్లిష్ చేస్తున్నా]

Thursday 15 August 2013

గిరీశం గీతోపదేశం!


భారత రాజకీయ నాయకుల అవినీతి అఘాయిత్యాలు విని దేవలోకంలో కలకలం చెలరేగిన వైనంబెట్టిదనిన.... భారత రాజకీయ విశ్వరూప సందర్శనం అను గిరీశం గీతోపదేశం ఈ రోజు ఈనాడు సంపాదకీయం పేజీలో....




Friday 9 August 2013

బుడుగోపాఖ్యానం!

మడిషన్నాక కూసంత కళాపోసనుండాల! లేకపోతే మడిషికీ, మన్మోహనసింగుకీ తేడా ఏటుంటాది!! ఇలా అని నేనన్లేదు. బాబాయ్ అంటుంటాడు. ఈ సింగెవరో నాకూ తెలీదు. ఢిల్లీలో ఉంటాట్ట. నాకు మా గల్లీ వోళ్లు మాత్రమే తెల్సు. సింగుక్కూడా పెద్దగా బోల్డన్నీ మాటలూ గట్రా రావట. సరిగా నడవడం చేతగాదట. అచ్చం నాలాగే ప్రతీదానికీ అస్తమానం అమ్మా అమ్మా అని కొంగుపట్టుకు తిరుగుతుంటాట్ట. ఇలా అని బాబాయే చెప్పాడు. బాబాయికిలాంటివి బోల్డు తెలుసు. ఎందుకంటే వాడు పొద్దస్తమానం గుడ్లగూబలా కళ్లప్పగించి టీవీ చూస్తుంటాడు. అందుకే వాడిక్కుంచెం బుర్ర పాడైపోయి ఇలాంటి డైలాగులన్నీ చెప్పేస్తుంటాడు. డైలాగులంటే తలాతోక లేకండా ఎలా పడితే అలా వాగేసేవన్నమాట. ఇలా అని నేనన్లేదు. బామ్మ అంటుంది. బామ్మక్కొంచెం మతిమరుపు. పాపం,  వయసైపోయింది కద. బామ్మకిప్పుడు ప్ఫదో, అరవయ్యో వయసుంటుంది. నాకంటే కుంచెం ప్పెద్దన్నమాట. పెద్ద వయసేం కాదు, కానీ కళ్లద్దాలు, మతిమరపొచ్చే వయసన్నమాట. అందుకే బామ్మ, బాబాయిని బడుద్దాయనీ, నన్నేమో హారి... పిడుగా అంటుంటుంది. బడుద్దాయంటే తిట్టటవన్నమాట. కానీ హారి పిడుగా అంటే పొగట్టమన్నమాట. నన్ను చూస్తే బామ్మకు బోల్డంత భయం. అందుకే నన్ను బాగా పొగిడేస్తుంది. లేడీస్ పొగిడితే నాకు ఒకటే సిగ్గు. బామ్మ కూడా లేడీసు కిందకే వస్తుందిలే.


 నా చిన్నప్పుడు బస్సులు, రైళ్లు నడిచేవి. ఇప్పుడంతా బందులు నడుస్తున్నాయి. బందుల్ని ఎవరు నడిపిస్తారంటే... తెలంగాణ, సమైక్యాంధ్ర కలిసి నడిపిస్తాయట. ఎవరికోసం నడిపిస్తారంటే... ఢిల్లీ వాళ్ల కోసం నడిపిస్తారట. అలా అని అమ్మ అంటుంది. అమ్మక్కూడా కుంచెం బానే విషయాలు తెలుసు. నా అంత కాదనుకోండి. అమ్మ సీరియళ్లు చూసీచూసీ బోరు కొట్టేసినప్పుడు వార్తలు గట్రా చూస్తుందన్నమాట. వార్తలంటే తెలంగాణ, సమైక్యాంధ్ర అన్నమాట!! నాక్కొంచెం అవమానమొచ్చి, ఏమ్.... మన ఐదరాబాదు కోసం బందులు చేయరా? అంటే, నోర్మూసుకో, వేల్డంత లేవు, పెద్ద విషయాలు నీకెందుకోయ్ అని నెత్తినో మొట్టికాయేస్తుంది. అప్పుడు నాకేమో ఒళ్లు మండుకుపోయి బోల్డంత ఖోపమొచ్చేస్తుంది. నేనేమన్నా చిన్నా వాడినా, చితకా వాడినా? నా అంతటి వాణ్ని నేను. బుడుగు అనుమానాల్ని భరించేవాడు కాడు. అందుకే మళ్లీ అడిగా అమ్మని. ఏమ్... మన ఐదరాబాదు కోసం బందులు చేయరా? అని. ఛస్... పోకిరీ వెధవా, వాగుడుకాయలా విసిగించావంటే.. చ్ఛితక్కొట్టి బళ్లో పడేస్తానేమనుకున్నావో, యెళ్లు బయటికి అని అమాంతం తెగ ఖోప్పడిపోయింది. సీరియళ్లు చూసీచూసీ అమ్మక్కుంచెం కోపమెక్కువైపోతోంది రానురాను. నాన్నకు చెప్పి బాగా ప్రెవేటు చెప్పించాలి. లేకపోతే మన సీక్రెట్లన్నీ కనిపెట్టేసి అస్తమానం భయపెట్టేస్తది. బడులుండడం చాలా డేంజరు. ఇది అనుభవమ్మీద నేనే కనిపెట్టా. ఈ బందుల్మీద మనక్కూడా పెద్దగా అభిప్రాయాల్లేవు. అభిప్రాయాలంటే అవి బాబాయికి ఉండేవన్నమాట. అయితేగియితే బందుల వల్ల బోల్డు లాభాలుంటాయ్. బందులుంటే బడులుండవన్నమాట. రెంటికీ పడదు. ఒకటుంటే ఒకటుండదు. నేనైతే బందులుండాలనే అనుకుంటా. అప్పడైతే ఎంచక్కా క్రికెట్టు ఆడుకోవచ్చు. సీగానపెసూనాంబతో షికార్లు కూడా చేస్కోవచ్చు. బందులుంటే అందరికీ ఆడిందే ఆట, పాడిందే పాట!!




 ఓ రోజు, అంటే చాల్రోజుల క్రితం, మా ఇంటో టీవీలో, వాడిపేరేంటబ్బా - గబుక్కుని గుర్తు రావట్లేదు, గుర్తొచ్చినప్పుడు చెప్తాలే - పొడుగాటి రింగుల జుట్టేస్కుని, ఎర్ర చొక్కాయేస్కుని, ముఖానికి నల్లరంగేస్కుని, కర్రపుల్లలా చిన్నబ్యాటుచ్చుకుని - వాడిసైజుకది చిన్నదే - అప్పుడు దొరకిన వాణ్ని దొరికినట్టుగ.. వందో, థౌజండో రన్స్ చితక బాదుతున్నాడా, నేనాట్టే గుడ్లప్పగించి చూస్తున్నానా.... ఇంతలో ఠకీమని పాలిటిక్సు పెట్టేశాడు నాన్న. పాలిటిక్సంటే వార్తలు. వార్తలంటే ఇందాకే చెప్పా కదా.. తెలంగాణ, సమైక్యాంధ్ర అని. టీవీలలో ఇవెప్పుడూ ఉంటాయ్. నాన్నకు చేస్కోవడానికి పనేం లేక పాలిటిక్సు చూస్తుంటాట్ట! పని లేకపోతే వంట చేయొచ్చుకదా అంటుందమ్మ. అది అమ్మ అభిప్రాయం. అమ్మ అభిప్రాయానికి పెద్ద విలువేం లేదనుకోండి. నాన్న పాలిటిక్సు పెట్టీగానే నాకప్పుడు బోల్డంత విపరీతమైన ఖోపమొచ్చేసింది. వెంటనే నాన్నను నా బ్యాటుతో అమాంతం కొఠేద్దామనుకున్నా. కానీ, నాన్న నాకంటే కుంచెం పెద్దవాడు కదా. పైగా, నాన్నను కొడితే అమ్మ మాత్రమే కొట్టాలట. ఎవరు పడితే వాళ్లు కొట్టరాదట. అలా అని బామ్మ అంటుంది. అది బామ్మ అభిప్రాయం. నా అభిప్రాయం వేరనుకోండి. పోన్లే నాన్నే కదా అని వదిలేశా. లేపోతే, ఆరోజు ఇండో-చైనా యుద్దవైపోయేదంతే. ఇండో-చైనా యుద్ధవంటే ఇప్పుడప్పుడే జరగనిదట. అలా అని బాబాయ్ చెప్పాడు. ఆ రోజు నా మనోభావాలు మొత్తం దెబ్బతినిపోయాయ్. ఎందుకంటే నా అంతటి వాణ్నినేను. నాన్న అంతటి వాడు, వాడు. నాక్కోపమొస్తే నాన్నను వాడు అంటాను. అది నాన్నకు వినిపించదనుకోండి. ఎప్పుడేనా, మనోభావాలు దెబ్బతింటే వెంటనే ఖండించాలట. తర్వాత క్షమాపణలు కోరమని డిమాండు చేయాలట. ధర్నా చేయాలట. చివరకు దాడికి దిగాలట. అవరసమైతే అన్నింటినీ బందు చేయాలట. మనోభావాలంటే ఇంత పెద్దగుంటాయట. ఇది కూడా బాబాయే చెప్పాడు. చెప్పా కదా, వాడు అస్తమానం టీవీ చూస్తుంటాడని. వాడికిలాంటివి చాలా తెలుసు. నాక్కూడా తెలుసనుకోండి. బాబాయ్ కూడా అప్పుడప్పుడు పాలిటిక్సు చేస్తుంటాడు. అందుకని పెళ్లీగిళ్లీ చేస్కోడట. పెళ్లి చేస్కుంటే పాలిటిక్సు సరిగా చేయలేమట. అది బాబాయ్ అభిప్రాయం. హైకమాండుకు వేరే అభిప్రాయముంది. హైకమాండంటే అమ్మ, నాన్న, బామ్మలన్నమాట. బాబాయికి పెళ్లి చేస్తేనే పిచ్చి కుదురుతుందట. పిచ్చి అంటే పాలిటిక్సనుకుంటూ అలా బలాదూర్ తిరగడమట. పెళ్లి మీద నాకూ ఓ అభిప్రాయముందనుకోండి. యేడిశావులే, నీ బోడి అభిప్రాయమెవడిక్కావాలోయ్ అంటారందరూనూ. నేను డ్యామింసల్ట్ అనేస్తా. బామ్మ తిట్టినప్పుడల్లా బాబాయ్ అలాగే అంటుంటాడు.


నా చదువు ఓ సమస్యట! సమస్యంటే బుక్కులుగిక్కులు, ఫీజులుగీజులు, బందులుగిందులూ బాగా పెరిగిపోయాయి కదా, అందుకన్నమాట. అలా అని బామ్మ, అమ్మతో అంటుంది. నేనందుకే బడికి రాజీనామా చేసిపారేస్తానన్నా. ఊర్కె, అస్తమానం బళ్లో కూచోటం నావల్లకాదు, నేను కూడా బాబాయిలా పాలిటిక్సులో చేరతానన్నా! బామ్మ, ఆ మాట విని బడవాఖానా అని తిడుతుంది. బామ్మకు కోపమొస్తే అలా అంటుంది. నాకు కోపమొస్తే జాటర్ ఢమాల్ అంటాను. ఈ మాటలకు అర్థాలుండవ్. అంటే అర్థం పర్థం లేని మాటలన్నమాట. అది వేరే సంగతి. యిందాక, రాజీనామాలంటే ఏంటో చెప్పలేదు కదూ. అయిందానికీ, కానిదానికీ చేసేవే రాజీనామాలట. అలా అని నాన్న టీవీ చూసేటప్పుడు పాలిటిక్సులో రాజీనామాలు చేసినోళ్లనీ, చేయనోళ్లనీ ఇద్దరికీ ప్రెవేట్ చెప్పేస్తుంటాడు. ప్రెవేట్ అంటే తిట్టడవన్నమాట. రాజీనామాలుంటాయ్ కాబట్టే పాలిటిక్సంటే నాకు బోల్డిష్టం. పాలిటిక్సులో చేరితే... బడికెళ్లి చదూకోవాల్సిన పనుండదట. ఎవరికైనా ప్రెవేటు చెప్పేయొచ్చట. మనల్నెవరూ అడిగేవాళ్లే ఉండరట. కావలిస్తే రాజీనామా చేసేసి ఇమానమొక్కేసి ఢిల్లీకెళ్లిపోవచ్చుట. బాబాయ్ చెప్పాడు. పాలిటిక్సులో బోల్డన్ని లాభాలు కాబట్టే, వాడు చదూగిదూ లేకుండా పాలిటిక్సులో బలాదూర్  తిరిగేస్తున్నాడు. మనం సీక్రెట్టుగా బాబాయిని కాకా పట్టి మెల్లిగా పాలిటిక్సులోకెళ్లిపోవాలి. ఈ విషయం నాన్నకు తెలీకూడదు. తెలిస్తే రౌడీ రాస్కిల్ అని తిడతాడు. రాస్కీల్ అనేది తెల్లొళ్ల భాష. రాజకీయాల్లో ఉన్నదంతా రౌడీలేనంటుంది బామ్మ. పక్కింటి పిన్నికీ, వాళ్ల మీసాల మొగుడుగారికీ ఈ విషయమసలే తెలీకూడదు. ఎందుకంటే వాళ్లసలే లోకులు. లోకులంటే కాకులన్నమాట. అలా అని బామ్మే అంటుంది. అర్జంటుగా యెళ్లిపోయి, సీగానపెసూనాంబకు పాలిటిక్సు విషయమై గాఠిగా ప్రెవేటు తీసుకోవాలి. ఆ పిల్లదసలే మట్టిబుర్ర! యెళ్లొస్తా. జై జాటర్ ఢమాల్!!! :)


[P.S: ఏదో సరదాకి రాసిందిది, ఎవరి మనోభావాలూ నొప్పించడానిక్కాదు :) ]

[Photos Courtesy: Google Images & Sridhar Cartoons!!]